Convocatoria de probas para a obtención do título de graduado/a en ESO para maiores de 18 anos

A Dirección Xeral de Educación, Formación Profesional e Innovación Educativa publica as convocatorias 2017 das probas para a obtención do título de graduado en educación secundaria obrigatoria para maiores de dezaoito anos.

Celebraranse en sesións de mañá e tarde os días 2 de xuño e 7 de setembro.

Requisitos para participar nas probas 

Poderán participar nestas probas as persoas que cumpran os seguintes requisitos:

1. Teren feitos os dezaoito anos o día anterior á data de realización da proba.
2. Non estaren en posesión do título de graduado en educación secundaria.
3. Non estaren nin teren estado matriculadas no curso 2016/17 nas ensinanzas de educación secundaria ordinaria nin nas de formación profesional básica.
4. O alumnado matriculado durante o curso 2016/17 na educación secundaria para persoas adultas poderá inscribirse nas probas se previamente cumpre as seguintes condicións:
4.1. Para acudir á primeira convocatoria, o alumnado ten que solicitar a baixa nas ensinanzas do segundo cuadrimestre. Así mesmo, as persoas con ámbitos do primeiro cuadrimestre sen superar deberán renunciar á avaliación extraordinaria deses ámbitos.
4.2. Para inscribirse na segunda convocatoria, o alumnado con ámbitos suspensos no segundo cuadrimestre ten que renunciar á avaliación extraordinaria deses ámbitos.

Prazos de matrícula

Os prazos de matrícula serán:

– Convocatoria de XUÑO: do 13 de marzo ao 24 de marzo de 2017, ambos os dous incluídos.
– Convocatoria de SETEMBRO: do 3 ao 10 de xullo de 2017, ambos os dous incluídos.

As persoas matriculadas para a primeira convocatoria, se non superan a totalidade dos ámbitos da proba, consideraranse matriculadas para a segunda convocatoria sen que teñan que presentar nova documentación.

Días de realización

As datas de celebración das probas son os días 2 de xuño e 7 de setembro para as respectivas convocatorias. Realizaranse en sesións de mañá e tarde.

Máis información

Resolución do 27 de xaneiro de 2017, da Dirección Xeral de Educación, Formación Profesional e Innovación Educativa, pola que se convocan as probas para a obtención do título de graduado en educación secundaria obrigatoria para maiores de dezaoito anos, nas convocatorias de xuño e setembro, e se ditan instrucións para a súa realización (DOG núm. 28 do 09.02.2017).