Axudas ás persoas desempregadas para establecerse como profesionais ou autónomos

O Diario Oficial de Galicia (DOG) publica hoxe as bases reguladoras da convocatoria para o ano 2016 do Programa de promoción do emprego autónomo.

A finalidade deste programa é axudar a financiar proxectos empresariais en Galicia que faciliten ás persoas desempregadas a creación do seu propio posto de traballo, ben mediante o desenvolvemento dunha actividade profesional ou ben a través da posta en marcha dunha actividade empresarial como persoas traballadoras autónomas.

Liñas de axuda

Subvención para iniciativas de autoemprego xuvenil. Destinada aos/ás menores de 30 anos na data da solicitude da axuda.
Subvención polo establecemento como persoa traballadora autónoma ou por conta propia. Resto de persoas desempregadas que poñan en marcha iniciativa empresarial ou profesional, incluídas persoas comuneiras ou socias de comunidade de bens ou sociedade civil de nova creación que o soliciten de forma individual.

Requisitos para ser beneficiario/a

Poderán ser beneficiarias das axudas deste programa as persoas desempregadas inscritas como demandantes de emprego no Servizo Público de Emprego, que procedan á creación do seu propio posto de traballo mediante a súa constitución en persoas traballadoras autónomas ou por conta propia, e que desenvolvan fundamentalmente a súa actividade empresarial ou profesional en Galicia, sempre que, cumprindo as condicións establecidas, reúnan os seguintes requisitos:

1. Se dean de alta no réxime especial de autónomos ou en calquera outro réxime especial por conta propia da Seguridade Social ou en mutualidade de colexio profesional entre o 1 de outubro de 2015 e o 30 de setembro de 2016, ambos inclusive, como titulares ou cotitulares do negocio ou explotación.
2. Non estar inscritas no Sistema nacional de garantía xuvenil.
3. Non percibisen subvencións ao abeiro dos distintos programas de emprego autónomo nos tres anos anteriores á data do inicio da nova actividade.
4. Non desenvolvesen como persoas traballadoras autónomas a mesma ou similar actividade na mesma localidade, nos seis meses inmediatamente anteriores á data do inicio da nova actividade, nin estivesen de alta como persoas traballadoras autónomas en calquera réxime da Seguridade Social ou en mutualidade de colexio profesional, sempre que a dita situación de alta presupoña actividade, nos tres meses inmediatamente anteriores. 

As persoas traballadoras autónomas ou por conta propia poderán ser beneficiarias das axudas deste programa, cando formen parte de comunidades de bens ou sociedades civís de nova creación, sempre que as soliciten a título persoal. Neste caso, a comunidade de bens ou sociedade civil deberá estar constituída previamente á presentación da solicitude de subvención. Quedan excluídas deste programa as persoas socias de sociedades mercantís, cooperativas e sociedades laborais e os autónomos colaboradores.

Máis información

Orde do 28 de decembro de 2015 pola que se establecen as bases reguladoras do Programa para a promoción do emprego autónomo, cofinanciado polo Fondo Social Europeo, con cargo ao programa operativo FSE Galicia 2014-2020, e se procede á súa convocatoria para o ano 2016.